ထိုင်းရောက် ရွှေ့ပြောင်း မြန်မာတွေအတွက် အားကိုးရာ
Sunday, March 10, 2013
ဦးဇောတိက ဟာ မကြာသေးမီက ထိုင်းနိုင်ငံမှာ ရှိတဲ့ မြန်မာသံရုံးမှာ ထိုင်းစုံတွဲရဲ့ နှိပ်စက်မှုကြောင့် ခန္ဓာကိုယ် ထိခိုက်ပျက်ဆီး ဒဏ်ရာတွေ ရခဲ့တဲ့ ကရင်မိန်းကလေးငယ်အတွက် ဘတ်ငွေ ၁ သောင်း မတ်လ ၃ ရက် နေ့က လှူဒါန်းခဲ့ပါသေးတယ်။
ကရင်မိန်းကလေးငယ်အတွက် ဘတ် ၁ သောင်း လှူဒါန်းစဉ်
မဟာချိုင်မှာ မြန်မာအလုပ်သမားတွေ အဖမ်းခံရတိုင်း သွား သွားပြီး ကယ်ထုတ်ရလို့ မဟာချိုင် ထိုင်းရဲတွေ က လည်း ဦးဇောတိကကို ကောင်းကောင်း သိကျွမ်းနေပါပြီ။
ကူညီကယ်ဆယ်မှုတွေကြောင့် မြန်မာရွှေ့ပြောင်းအလုပ်သမားတွေကြားမှလူသိများတဲ့ ဦးဇောတိက ဟာ ထိုင်းနိုင်ငံ မြောက်ပိုင်း ချင်းမိုင်မြို့မှာ မထင်မှတ်ဘဲ ဧရာဝတီနဲ့ ဆုံတွေခိုက်မှာ ဦးဇောတိကရဲ့ အကြောင်း တစေ့ တစောင်း သိခွင့် ရခဲ့ပါတယ်။
ချင်းမိုင်မြို့က ၀ပ်ဆိုင်းမွန်း မြန်မာဘုန်းတော်ကြီးကျောင်းမှာ ပျံလွန်တော်မူသွားတဲ့ အဂ္ဂမဟာ သဒ္ဒမ္မ
ဇောတိကဓဇ ဘန္ဒန္တ ဥူးအာသဘရဲ့ ဈာပနပွဲကို လာရောက်ကာ ဘတ်ငွေ ၁ သောင်း လှူဒါန်းဖို့ရယ်၊
ကျောက်ကပ် ကျန်းမာရေး မကောင်း ဖြစ်နေလို့ ဆေးကုသခံနေရတဲ့ နိုင်ငံရေးအကျဉ်းသားဟောင်း ဦးဇ၀နကို ဂါရ၀ ပြုဖို့လာတဲ့အကြောင်း ဦးဇောတိက က ဧရာဝတီကို မိန့်ကြားပါတယ်။
သက်တော် ၄၂ နှစ်ရှိပြီး ၀ါတော် ၂၂ ၀ါ ရှိပြီဖြစ်တဲ့ ဦးဇောတိဟာ ထိုင်းနိုင်ငံကို ၂၀၀၅ ခုနှစ်ကတည်း က ရောက်ရှိနေထိုင် လာခဲ့တာပါ။
ဦးဇောတိကဟာ ၁၉၉၆ လောက်ကတည်းက သွားချီလာချီ အနေနဲ့ ထိုင်းနိုင်ငံကို ရောက်လာခဲ့ ပြီး ၂၀၀၅ ခုနှစ်မှာတော့ ချုံဘူရီမှာ နေထိုင်ခဲ့ပြီး နောက်ပိုင်း ဘန်ကောက်ကို ပြောင်းရွှေ့နေထိုင်လာသူပါ။
“အခက်အခဲတွေ ဖြစ်နေလို့ ဘုန်းဘုန်းဆီ ဖုန်းဆက် အကူအညီတောင်းလာသူတွေကို ကူညီရေး၊ ကယ်ဆယ်ရေးတွေ တတ်နိုင်သလောက် လုပ်ပေးနေတာပါ” လို့ ဦးဇောတိက က ဧရာဝတီကို မိန့်ကြားပါတယ်။
ကူညီမှုတွေ လုပ်ဆောင်တဲ့အထဲက အမှတ်တရ အဖြစ်ဆုံး ကိစ္စ တခုဖြစ်တာကတော့ ပြီးခဲ့တဲ့ ၃၊ ၄ လောက်က ထိုင်းနိုင်ငံ မဟာချိုင်မှာ ရောင်းစားခံရတဲ့ မြန်မာအလုပ်သမားတွေက မြန်မာပြည်က သူတို့ ဆွေးမျိုးတွေကို ကြိုးစားဆက်သွယ် အသိ ပေးတော့ သူတို့ကိုယ် ခေါ်သွားတဲ့ ကယ်ရီ ကို မြန်မာပြည်မှာဖမ်းလိုက်လို့ ဖြစ်လာတဲ့ နောက်ဆက်တွဲပါလို့ ဦးဇောတိက က မိန့်ပါတယ်။
“အဲဒီတော့ ဘန်ကောက်က စက်ရုံကလည်း သူတို့ကိုပါ လာဖမ်းမှာ ကြောက်ပြီး စက်ရုံထဲက လူတွေကို တခါတည်း မောင်း ထုတ်လိုက်တယ်။ ဒီတော့ မသွားတတ် မလာတတ်နဲ့ လမ်းဘေးမှာ ရောက်နေတဲ့ သူတွေကို ဘုန်းဘုန်းတို့ သွားကယ်ခဲ့ရ တာ ဆိုလို့ရှိရင် လူတိုင်း သိတဲ့ အမှုပေါ့” လို့ သူက ဆက်ပြောပါ တယ်။
အဲဒီတုန်းက ထိုင်းရောက် ရွှေ့ပြောင်းမြန်မာအလုပ်သမားများအဖွဲ့နဲ့ အတူ သွားရောက်ကယ်ထုတ်ခဲ့ရတာ လို့ ဆိုပါတယ်။
ထိုင်းနိုင်ငံမှာ ကူညီဆောင်ရွက်မှုတွေ လုပ်နေတာနဲ့ပတ်သက်ပြီး ထိုင်းရှိ မြန်မာသံရုံးနဲ့လည်း နောက်ပိုင်းမှာ ပူးပေါင်း လုပ် ဆောင်လာတာ ရှိတယ်လို့ သူက မိန့်ပါတယ်။
“အရင်ကတော့ မြန်မာသံရုံးနဲ့ ပူးပေါင်း လုပ်ဆောင်တာ မရှိဘူးပေါ့။ အခုနောက်ပိုင်း ဘုန်းဘုန်းတို့ ကူညီ လုပ်ဆောင်နေတာ ကို သူတို့ကလည်း အသိအမှတ်ပြုလာပြီးနောက်ပိုင်း ပူးပေါင်းလုပ်ဆောင်ဖြစ်လာ တာပါ”လို့ ဦးဇောတိက က မိန့်ပါတယ်။
အခုနောက်ပိုင်း ကူညီကယ်ဆယ်ရေး လုပ်ငန်းလုပ်တဲ့အခါ တရားဝင် လက်မှတ် အထောက်အထားတွေ မရှိတဲ့ မြန်မာတွေ လည်းပါတော့ ကားနဲ့ သွားကယ်ထုတ်ရတဲ့အခါ ကားကို ထိုင်းအာဏာပိုင်တွေဘက်က အနှောက်အယှက်မလုပ်ဘဲ ဖမ်းဆီး ခံရမှုတွေမဖြစ်အောင် မြန်မာသံရုံးရဲ့ အကူအညီကို ရယူရတယ်လို့ ဆိုပါတယ်။
အခုလို လှူဒါန်းမှုတွေ လုပ်နိုင်တာကတော့ အဓိက အဲဒီ ဒေသတ၀ိုက်မှာ ရှိတဲ့ ရွှေ့ပြောင်းမြန်မာ အလုပ်သမားတွေရဲ့ လှူဒါန်းမှုတွေထဲ က ၃ ပုံ ၂ ပုံကို လှူဒါန်းပေးနေတာဖြစ်တယ်လို့ ဦးဇောတိက က ဆိုပါတယ်။
“ဦးဇင်းကို လှူလာတဲ့ အထဲက ၃ ပုံ ၂ ပုံကို ပြန်လှူတယ်။ ဦးဇင်းက ဘယ် NGO မှ လည်း အဆက် အသွယ်မရှိပါဘူး”
No comments:
Post a Comment