| ရှမ်းပြည်တပ်မတော် တောင်ပိုင်း (SSA-S) မှ ဒု ဗိုလ်ချုပ်ကြီး ယွက်စစ်နှင့် ဒု ကာကွယ်ရေးဦးစီးချုပ် ဗိုလ်ချုပ်ကြီး စိုးဝင်းတို့ မေလ ၁၉ ရက်နေ့က သဘောတူညီချက်များ လက်မှတ်ထိုးပြီးနောက် လက်ဆွဲနှုတ်ဆက်စဉ် (ဓာတ်ပုံ – ဧရာဝတီ) |
မြန်မာ အစိုးရနှင့် ရှမ်းပြည် တပ်မတော် တောင်ပိုင်း (SSA-S ) တပ်မတော် အကြား ငြိမ်းချမ်းရေး ဆွေးနွေးမှုမှာ တနှစ်ပြည့်မြောက်ပြီ ဖြစ်သော်လည်း အောင်မြင်မှုမရှိဘဲ တိုက်ပွဲများသာ ဆက်လက် ဖြစ်ပွားနေကြောင်း SSA
တောင်ပိုင်း တပ်ဖွဲ့မှ ဒုတိယ ဗိုလ်ချုပ်ကြီး ယွက်ဆစ်က ပြောသည်။
နိုဝင်ဘာလ ၇ ရက်နေ့က ထိုင်းနိုင်ငံ အခြေစိုက် သျှမ်းသံတော်ဆင့် သတင်းဌာန နှင့်တွေ့ဆုံ မေးမြန်းခန်းတွင် ၎င်းက အထက်ပါအတိုင်း ပြောဆိုလိုက်ခြင်း ဖြစ်သည်။
၂၀၁၁ ခုနှစ် နိုဝင်ဘာလမှ စတင်ပြီး အစိုးရနှင့် SSA တောင်ပိုင်း အဖွဲ့တို့ အပစ်အခတ် ရပ်စဲ၍ ငြိမ်းချမ်းရေး တွေ့ဆုံဆွေးနွေးခဲ့ကြရာတွင်
နှစ်ဦးနှစ်ဖက်အကြား အချက် ၁၂ ချက်ကို သဘောတူညီမှု ရရှိခဲ့ကြောင်း၊ သို့သော်လည်း ယခု ၂၀၁၂ ခုနှစ်၊ နိုဝင်ဘာလ တနှစ်ကြာသည်အထိ သဘောတူညီချက်များကို အကောင်အထည် ဖော်နိုင်ခြင်း မရှိဘဲ တနှစ်အတွင်း တိုက်ပွဲ ၃၂ ကြိမ်ဖြစ်ပွားခဲ့ကြောင်း ၎င်းးက ဆိုသည်။
“တနှစ်တာကာလ အတွင်းမှာ လက်တွေ့ အကောင်အထည် ဖော်နိုင်တာ ဘာမှမရှိ။ မြန်မာ စစ်တပ်ဘက်က ကျနော်တို့ တပ်စခန်းတွေကို တက်တိုက်နေလို့ပါပဲ။ တနှစ်တာ အတောအတွင်း ဖြစ်ပွားခဲ့တဲ့ တိုက်ပွဲ ၃၂ ကြိမ်လုံးလုံး ကျနော်တို့ဘက်က ခုခံတာပဲ။ သူတို့ကျတော့ အထက်က တိုက်ခိုင်းလို့ တိုက်နေတာ ဖြစ်တယ်” ဟု ဒုဗိုလ်ချုပ်ကြီးယွက်ဆစ်က ရှင်းပြသည်။
အစိုးရနှင့် SSA တောင်ပိုင်း အကြား တိုက်ပွဲများ ဖြစ်ပွားတိုင်း အစိုးရငြိမ်းချမ်းရေး အဖွဲ့ ခေါင်းဆောင်တဦး ဖြစ်သူ ဦးအောင်မင်းထံ
ဆက်သွယ် စာရေး အကြောင်းကြား သော်လည်း ထိုးစစ်များ ရပ်တန့်သွားစေရန် ထိရောက်စွာ တားဆီးပေးနိုင်စွမ်းမရှိကြောင်း၊ မုံးတော့ မုံးထားနယ်မြေကို SSA တောင်ပိုင်းကို ပေးထားသည်ဟု ဆိုသော်လည်း မြန်မာစစ်တပ်က ခွင့်ပြုချက်မပေးမှုကြောင့် ယခုအချိန်အထိ
တပ်နေရာ ချထားမှု မလုပ်နိုင်သေးကြောင်း ၎င်းက ဆက်လက်ပြောဆိုသည်။
“ကျနော်တို့က တိုက်ပွဲဖြစ်တဲ့ အခါတိုင်း ဦးအောင်မင်းဆီ စာရေးအကြောင်းကြားတယ်။ ထိရောက်အောင် တားဆီးပေးနိုင်စွမ်း မရှိဘူး။ နယ်မြေဖွံ့ဖြိုးရေး ဆိုတာကလည်း မုံးတော့ မုံးထားပေးမယ်လို့ပြောပေမယ့် အခုထိ တခွန်းမှ မဟဘူး” ဟု ဒုဗိုလ်ချုပ်ကြီး ယွက်ဆစ်က ပြောသည်။
မြန်မာစစ်တပ်နှင့် SSA တောင်ပိုင်းတို့ ငြိမ်းချမ်းရေး အကောင်အထည် ဖော်နိုင်ရန် ယုံကြည်မှု လိုအပ်ကြောင်း၊ အထူးသဖြင့် မြန်မာအစိုးရနှင့် စစ်တပ်၏ ငြိမ်းချမ်းရေး ရယူလိုမှုအပေါ်တွင် အဓိက မူတည်နေကြောင်း၊ တိုက်ပွဲများ မကြာခဏဆို သလိုဖြစ်ပွားပါက ငြိမ်းချမ်းရေးပျက်စီးပြီး ယခင်အခြေအနေ ပြန်လည်ရောက်ရှိမည် ဖြစ်ကြောင်း၊ လက်ရှိတွင် အစိုးရနှင့် ငြိမ်းချမ်းရေး ဆွေးနွေးမှု လုပ်ရန် တောင်ကြီးမြို့တွင် တွေ့ဆုံနိုင်ဖွယ် ရှိကြောင်း သိရှိရသည်။
အစိုးရနှင့် SSA တောင်ပိုင်း သဘောတူညီချက် ၁၂ ချက်တွင် မူးယစ်ဆေးဝါး ပူးတွဲနှိမ်နင်းရေး၊ SSA တောင်ပိုင်း အဖွဲ့နှင့် မိသားစုဝင်များ နေရာချထားရေး၊ စီးပွားရေး လုပ်ငန်းများ ဖော်ဆောင်ရေးစသည့် အချက်များပါဝင်သည်။
မြန်မာအစိုးရ ငြိမ်းချမ်းရေးအဖွဲ့မှ အကျိုးဆောင်တဦးဖြစ်သူ ဦးလှမောင်ရွှေကမူ တိုက်ပွဲများဖြစ်ပွားနေသည့် ကိစ္စအပေါ် မငြင်းလိုသော်လည်း အမှန်တကယ် ငြိမ်းချမ်းရေး အကောင် အထည်ဖော်နိုင်ရန် အချိန်ယူရန်လိုအပ်ပြီး နှစ်ဦးနှစ်ဖက်အကြား စံသတ်မှတ်ချက်ကို တွေ့ဆုံညှိုနှိုင်းမှု နှင့်ပြုလုပ်သွားရမည် ဖြစ်ကြောင်း ရှင်းပြသည်။
“ကျနော်ကတော့ အကုန်လုံးကိုတော့ မငြင်းပါဘူး။ တချို့ဟာတွေ အကောင်အထည် ဖော်ဖို့ကတော့ အချိန်ယူဖို့တွေ လိုမှာပေါ့ဗျာ၊ စံက တဖက်နဲ့ တဖက်ကတော့ ချက်ချင်ကြီး တူဖို့ ကိစ္စကတော့ ချက်ချင်တော့ မရဘူး နှစ်ဖက် စလုံး တွေ့ရှိပြီးတော့ လုပ်ကြရ မှာပေါ့” ဟု ဦးလှမောင်ရွှေက ပြောသည်။
SSA တောင်ပိုင်းက ကုမ္ပဏီ ထူထောင်ထားသည်ဟု ကြားသိထားပြီး နောက်ပိုင်းတွင် တရားဝင် ကုမ္ပဏီထောင်ခွင့် ပြုမည်ဖြစ်ကြောင်း၊ နော်ဝေနိုင်ငံ၏ အထောက်အပံ့ဖြင့် SSA တောင်ပိုင်းနယ်မြေတွင် အိမ်အလုံး ၃၀၀ညှိုနှိုင်းနေပြီး တဖြည်းဖြည်းဖွံ့ဖြိုးရေးလုပ်ဆောင်မှု အရှိန်မြန်ဆန်လာမည်ဟု ဦးလှမောင်ရွှေက ဆက်လက်ပြောသည်။
၂၀၁၂ခုနှစ် မေလ ၁၉ ရက်နေ့ တွင် မြန်မာအစိုးရနှင့် SSA တောင်ပိုင်းတို့ အပစ်အခတ် ရပ်စဲရေးနှင့် ငြိမ်းချမ်းရေး ဆွေးနွေးရေး သတောတူညီချက် ၁၂ ချက် လက်မှတ်ရေးထိုး ခဲ့ကြပြီးနောက် ရက်ပိုင်းအတွင်း တိုက်ပွဲများ ပြန်လည် ဖြစ်ပွားမှုအတွက် မြန်မာစစ်တပ်မှ ဒုတိယတပ်မတော် ကာကွယ်ရေး ဦးစီးချုပ် ဗိုလ်ချုပ်ကြီးစိုးဝင်းက SSA တောင်ပိုင်းထံသို့ တရားဝင် တောင်းပန်ခဲ့သည်။
ဧရာဝတီ
No comments:
Post a Comment